ഇന്ത്യക്കാരന് മര്‍ദനം: അമേരിക്കയില്‍ പോലീസുകാരനെതിരെ കുറ്റംചുമത്തി

Posted on: 29 Mar 2015

വാഷിങ്ടണ്‍: അമേരിക്കയിലെ മാഡിസണില്‍ ഇന്ത്യക്കാരനെ മര്‍ദിച്ച സംഭവത്തില്‍ പോലീസ് ഓഫീസര്‍ക്കെതിരെ കുറ്റംചുമത്തി. ഗുജറാത്ത് സ്വദേശി 57-കാരനായ സുരേഷ്ഭായ് പട്ടേലിനാണ് മര്‍ദനമേറ്റത്. കേസില്‍ പത്തുവര്‍ഷംവരെ തടവുശിക്ഷ ലഭിക്കാവുന്ന കുറ്റങ്ങളാണ് എറിക് പാര്‍ക്കറെന്ന പോലീസ് ഉദ്യോഗസ്ഥനെതിരെ ചുമത്തിയത്.

ഫിബ്രവരി ആറിനായിരുന്നു സംഭവം. ഫോണ്‍ സന്ദേശം ലഭിച്ചതിനെത്തുടര്‍ന്ന് മാഡിസണില്‍ എത്തിയ പോലീസ് ഉദ്യോഗസ്ഥന്‍ പ്രദേശത്ത് നടക്കാനിറങ്ങിയ സുരേഷ് ഭായി പട്ടേലിനെ മര്‍ദിച്ചു. 17 മാസം പ്രായമുള്ള പേരക്കുട്ടിയെ സന്ദര്‍ശിക്കാന്‍ അമേരിക്കയിലെത്തിയ പട്ടേലിന് ഇംഗ്ലീഷ്ഭാഷ വശമില്ലായിരുന്നു. അതിനാല്‍ പോലീസിന്റെ ചോദ്യങ്ങള്‍ക്ക് മറുപടി നല്‍കാന്‍ കഴിഞ്ഞില്ല. തുടര്‍ന്നായിരുന്നു മര്‍ദനം. മര്‍ദനത്തില്‍ പട്ടേലിന്റെ ശരീരം ഭാഗികമായി തളര്‍ന്നു.
 http://www.mathrubhumi.com/online/malayalam/news/story/3502525/2015-03-29/world