പാക്കിസ്ഥാനില്‍ ക്രിസ്ത്യന്‍ ദമ്പതികളെ ചുട്ടുകൊന്നത് രക്ഷപ്പെടാതിരിക്കാന്‍ കാലു തല്ലിയൊടിച്ചതിനുശേഷം

	World
2014-11-11/ 4M Reporter ഇസ്ലാമബാദ് : ദൈവദൂഷണമാരോപിച്ച് പാക്കിസ്ഥാനില്‍ ക്രിസ്ത്യന്‍ ദമ്പതികളെ ചുട്ടുകൊന്നത് കാലുതല്ലിയൊടിച്ചതിനുശേഷം. ഗര്‍ഭിണിയായ ഷാമാ ബിബി (24)യുടെ ശരീരം അതിവേഗം കത്തുന്നതിന് പരുത്തിത്തുണി പുതപ്പിച്ചതായും ആ ഭീകരദൃശ്യത്തിന് സാക്ഷിയായ ബന്ധുക്കള്‍ വെളിപ്പെടുത്തി. 1200 ഓളം വരുന്ന ജനക്കൂട്ടമാണ് ഷാമായെയും ഭര്‍ത്താവ് സജ്ജദ് മാസിഹിനെയും വളഞ്ഞാക്രമിച്ചത്. അവരെ ഇഷ്ടികചൂളയിലേക്ക് വലിച്ചെറിഞ്ഞശേഷം ജീവനോടെ കത്തിക്കുകയായിരുന്നു. കൈകാലുകളില്‍ പിടിച്ച് ഇഷ്ടികചൂളയിലേക്ക് കൊണ്ടുപോയശേഷം വസ്ത്രങ്ങള്‍ക്ക് തീകൊളുത്തി. തുടര്‍ന്ന് ചൂളയിലേക്ക് വലിച്ചെറിയുകയായിരുന്നു. നാലു മാസം ഗര്‍ഭിണിയായിരുന്ന ഷാമാ തീപിടിക്കാത്ത തരത്തിലുള്ള വസ്ത്രമാണ് ധരിച്ചിരുന്നത്. ജനക്കൂട്ടം അത് വലിച്ചുമാറ്റിയതിനുശേഷം പരുത്തിത്തുണി കൊണ്ട് പൊതിയുകയായിരുന്നു. പരുത്തിത്തുണി അതിവേഗം തീപിടിക്കുമെന്നതുകൊണ്ടാണ് അതുകൊണ്ട് പുതപ്പിച്ചത്. സജ്ജദ് ഓടിരക്ഷപ്പെടാതിരിക്കാന്‍ അയാളുടെ കാലുകള്‍ തല്ലിയൊടിക്കുകയുംചെയ്തു. വിശുദ്ധ ഖുറാന്റെ കോപ്പി കീറിയെന്നാരോപിച്ചുകൊണ്ടാണ് ലാഹോറില്‍നിന്ന് തെക്കു പടിഞ്ഞാറ് സ്ഥിതിചെയ്യുന്ന ചക്ക് 59 എന്ന ഗ്രാമത്തില്‍ കൊടുംക്രൂരത അരങ്ങേറിയത്. സംഭവം വ്യാപകമായ പ്രതിഷേധമുണ്ടാക്കിയിട്ടുണ്ട്. ഇതോടനുബന്ധിച്ച് 44 പേരെ പൊലീസ് അറസ്റ്റു ചെയ്തു.
			http://4malayalees.com/index.php?page=newsDetail&id=52