കാൽകഴുകൽ ശുശ്രൂഷയിൽ വനിതകളും; പെസഹാചരണത്തിൽ പുതിയ അധ്യായം

Friday 25 March 2016 01:02 AM IST

byസ്വന്തം ലേഖകൻ

 പെസഹ ശുശ്രൂഷയുടെ ഭാഗമായി പുനലൂർ സെന്റ് മേരീസ് കത്തീഡ്രലിൽ ബിഷപ് ഡോ. സെൽവിസ്റ്റർ പൊന്നുമുത്തൻ സന്യാസിനികളുടെ പാദങ്ങൾ കഴുകുന്നു.

പുനലൂർ ∙ യേശുക്രിസ്തുവിന്റെ അന്ത്യ അത്താഴം അനുസ്മരിച്ചുകൊണ്ട് പെസഹവ്യാഴ ദിനമായ ഇന്നലെ പുനലൂർ സെന്റ് മേരീസ് കത്തീഡ്രലിൽ ബിഷപ് ഡോ. സെൽവിസ്റ്റർ പൊന്നുമുത്തൻ സന്യാസിനികളുടെ പാദങ്ങൾ കഴുകി. ഫ്രാൻസിസ് മാർപാപ്പയുടെ ആഹ്വാന പ്രകാരമാണ് പാദക്ഷാളന ശുശ്രൂഷയിൽ വനിതകളെ ഉൾ‌പ്പെടുത്തിയത്. വികാരി ഫാ. ക്രിസ്റ്റി ജോസഫിന്റെ കാർമികത്വത്തിൽ നടന്ന ശുശ്രൂഷകൾക്കു ഫാ. ജിജോ ജോർജ് സഹകാർമികത്വം വഹിച്ചു. വൈകിട്ടു ബിഷപ്പിന്റെ കാർമികത്വത്തിൽ നടന്ന പാദക്ഷാളന ശുശ്രൂഷയിലും ദിവ്യബലിയിലും ദിവ്യകാരുണ്യ ആരാധനയിലും നൂറുകണക്കിനു വിശ്വാസികൾ പങ്കെടുത്തു. ദുഃഖവെള്ളിയായ ഇന്നു യേശുക്രിസ്തുവിന്റെ കുരിശുമരണം അനുസ്മരിച്ചുള്ള ചടങ്ങുകൾ നടക്കും.

രാ‌വിലെ 5.30നു പുത്തൻപാന പാരായണം, ഏഴിനു കുരിശിന്റെ വഴി, ഡീക്കൻ ബെയ്സിൽ നടത്തുന്ന വ്യാകുല പ്രസംഗം, 9.30 മുതൽ ദിവ്യകാരുണ്യ ആരാധന, മൂന്നിന് പീഡാനുഭവ വായന, കുരിശാരാധന, ദിവ്യകാരുണ്യ സ്വീകരണം, തിരുസ്വരൂപ ചുംബനം, മുൾമുടി നേർച്ച, പുത്തൻപാന പാരായണം, കബറടക്കം എന്നിവയുണ്ടാകും. നാളെ ജാഗരാരംഭം ഡോ. സെൽവിസ്റ്റർ പൊന്നുമുത്തന്റെ കാർമികത്വത്തിൽ നടക്കും. പുത്തൻതീ, ജ്ഞാനസ്നാന ജലം വെഞ്ചരിപ്പ്, പെസഹ ജാഗരാനുഷ്ഠാനം, ഉയിർപ്പു ദിവ്യബലി എന്നിവ ഉണ്ടാകുമെന്ന് വികാരി ഫാ. ക്രിസ്റ്റി ജോസഫ്, ഫാ. ജിജോ ജോർജ്, ഡീക്കൻ ബെയ്സിൽ, അജപാലന സെക്രട്ടറി ജോൺസൺ ഏലിയാസ്, ട്രഷറർ ജോസഫ് തോമസ്, പിസിസി കോ–ഓർ‌ഡിനേറ്റർ സെബാസ്റ്റ്യൻ വിൻസന്റ് എന്നിവർ അറിയിച്ചു.

http://localnews.manoramaonline.com/kollam/local-news/24-punalur-bishop.html