അഭയാർഥികൾക്കൊപ്പം മാർപാപ്പയുടെ സമാധാന പ്രാർഥന

Tuesday 20 September 2016 11:28 PM IST

by സ്വന്തം ലേഖകൻ

ഇറ്റലിയിലെ അസീസി ഹോളി കോൺവന്റിൽ നടന്ന മതനേതാക്കളുടെ സമ്മേളനത്തിൽ പങ്കെടുക്കാനെത്തിയ എക്യുമെനിക്കൽ പാത്രിയർക്കീസ് ബർത്തലോമിയോ ഒന്നാമനെ ഫ്രാൻസിസ് മാർപാപ്പ ആലിംഗനം ചെയ്യുന്നു. സിറിയൻ ഓർത്തഡോക്സ് സഭാ തലവൻ പരിശുദ്ധ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവാ സമീപം.

അസീസി (ഇറ്റലി) ∙ വിശുദ്ധ ഫ്രാൻസിസിന്റെ ജന്മനഗരമായ ഇവിടെ നടത്തിയ സമാധാന പ്രാർഥനയിൽ മാർപാപ്പയ്ക്കൊപ്പം വിവിധ മതനേതാക്കളും അഭയാർഥികളും പങ്കെടുത്തു. ഹിന്ദു, മുസ്​ലിം, ജൂത, ക്രിസ്ത്യൻ നേതാക്കളും 12 അഭയാർഥി പ്രതിനിധികളും ചടങ്ങു ധന്യമാക്കി.‌ ഫ്രാൻസിസ്കൻ കോൺവന്റിൽ ഇവർക്കൊപ്പം ഫ്രാൻസിസ് മാർപാപ്പ ഭക്ഷണം കഴിച്ചു. പ്രധാന ചത്വരത്തിൽ സമാപന ചടങ്ങിൽ യുദ്ധരക്തസാക്ഷികളുടെ സ്മരണയ്ക്കായി മൗനാചരണം നടത്തി.

ജോൺ പോൾ രണ്ടാമൻ മാർപാപ്പ 1986ൽ തുടക്കമിട്ട സർവമത പ്രാർഥനയ്ക്ക് ഇത്തവണ എത്തിയവരിൽ കാന്റർബറി ആർച്ബിഷപ് ജസ്റ്റിൻ വെൽബിയും കുസ്തന്തീനോസ് (ഇസ്തംബുൾ) ഓർത്തഡോക്സ് പാത്രിയർക്കീസ് ബർത്തലോമി ഒന്നാമനും ഉണ്ടായിരുന്നു. മൂന്നുപേരും പ്രസംഗിച്ചു.

നൈജീരിയ, എറിട്രിയ, മാലി, സിറിയയിലെ ആലപ്പോ എന്നിവിടങ്ങളിൽ നിന്നെത്തിയവരായിരുന്നു അഭയാർഥി പ്രതിനിധികൾ. ലോകം യുദ്ധത്തിലും സഹനത്തിലുമാണെന്നു പറഞ്ഞ ഫ്രാൻസിസ് മാർപാപ്പ ദൈവത്തിന്റെ പേരി‍ൽ നടക്കുന്ന യുദ്ധങ്ങളെ അപലപിച്ചു.

http://www.manoramaonline.com/news/world/in-popes-prayer-with-refugees.html