മംഗളൂരുവില്‍ ക്രിസ്ത്യന്‍ ദേവാലയത്തിനു നേരേ ആക്രമണം

മംഗളൂരു: മംഗളൂരുവില്‍ ക്രൈസ്തവ ദേവാലയത്തിനു നേരേ ആക്രമണം. ദെര്‍ളകട്ടയ്ക്കടുത്ത പനിറിലെ വിശുദ്ധ ജോസഫ് വാസിന്റെ നാമധേയത്തിലുള്ള കപ്പേളയ്ക്കു നേരേയാണ് സാമൂഹ്യവിരുദ്ധരുടെ ആക്രമണമുണ്ടായത്. ചൊവ്വാഴ്ച അര്‍ധരാത്രിക്കു ശേഷമാണ് ആക്രമണമുണ്ടായതെന്നാണു കരുതുന്നത്. മാതാവിന്റെയും ഉണ്ണീശോയുടെയും രൂപം സ്ഥാപിച്ചിരുന്ന രൂപക്കൂടിന്റെ ചില്ല് കല്ലെറിഞ്ഞു തകര്‍ത്ത നിലയിലാണ്. ഇന്നലെ രാവിലെ കപ്പേളയിലെത്തിയവരാണ് ആക്രമണവിവരം അറിയിച്ചത്. എറിയാനുപയോഗിച്ച കല്ല് രൂപക്കൂടിനുള്ളില്‍ നിന്നു ലഭിച്ചു. സംഭവത്തില്‍ കൊണാജെ പോലീസ് കേസെടുത്ത് അന്വേഷണം ആരംഭിച്ചു. ആക്രമണത്തിനു പിന്നില്‍ ഏതെങ്കിലും വ്യക്തിയാണോ, അല്ലെങ്കില്‍ സംഘമാണോയെന്നു അന്വേഷിച്ചുവരികയാണെന്ന് മംഗളൂരു പോലീസ് കമ്മീഷണര്‍ എസ്. മുരുകന്‍ അറിയിച്ചു. ഡല്‍ഹിയിലെ ആക്രമണങ്ങളുടെ പശ്ചാത്തലത്തില്‍ വിഷയം ഗൌരവമായെടുക്കുമെന്നും അദ്ദേഹം പറഞ്ഞു. ചൊവ്വാഴ്ച രാത്രി സംശയാസ്പദമായ സാഹചര്യത്തില്‍ രണ്ടുപേര്‍ കപ്പേളയ്ക്കു മുന്നില്‍ ഇരിക്കുന്നതു കണ്ടതായി പ്രദേശവാസിയായ ഒരു വിദ്യാര്‍ഥി പോലീസിനു മൊഴി നല്കിയിട്ടുണ്ട്. സംഭവത്തെത്തുടര്‍ന്ന് ഇന്നലെ കര്‍ണാടക ആരോഗ്യമന്ത്രിയും സ്ഥലം എംഎല്‍എയുമായ യു.ടി. ഖാദര്‍ സ്ഥലം സന്ദര്‍ശിച്ചു. കുറ്റവാളികളെ ഉടന്‍ നിയമത്തിനു മുന്നില്‍ കൊണ്ടുവരുമെന്ന് അദ്ദേഹം ഉറപ്പുനല്കി. സമൂഹത്തില്‍ അരക്ഷിതാവസ്ഥ ലക്ഷ്യംവച്ചാണ് ആക്രമണമുണ്ടായിരിക്കുന്നതെന്നും അദ്ദേഹം പറഞ്ഞു. എസിപി ശങ്കര്‍ ഷെട്ടി, എസ്ഐ ഭാരതി എന്നിവരടക്കമുള്ള പോലീസ് ഉദ്യോഗസ്ഥരും മന്ത്രിക്കൊപ്പമെത്തിയിരുന്നു. സംഭവസ്ഥലത്തുനിന്നു സിഗരറ്റ് കുറ്റികള്‍ കണ്ടിരുന്നു. പ്രദേശത്ത് സാമൂഹ്യവിരുദ്ധരുടെ ശല്യമുള്ളതായി നാട്ടുകാര്‍ മന്ത്രിയെ അറിയിച്ചു.   http://www.deepika.com/ucod/