സ്ത്രീധനപീഡനക്കേസില്‍ ആള്‍ദൈവം രാധെമായെ പോലീസ് ചോദ്യംചെയ്യും

Posted on: 10 Aug 2015

മുംബൈ: സ്ത്രീധനപീഡനം ആരോപിച്ച് യുവതി നല്‍കിയ പരാതിയില്‍ മുംബൈയിലെ ആള്‍ദൈവം രാധെമായെ പോലീസ് ചോദ്യംചെയ്യും. നന്ദേഡില്‍ സത്സംഗത്തിന് പോയിരുന്ന അവര്‍ പോലീസിന്റെ ആവശ്യപ്രകാരം മുംബൈയില്‍ മടങ്ങിയെത്തിയിട്ടുണ്ട്. ഇവരെ സ്വീകരിക്കാന്‍ ആരാധകര്‍ വിമാനത്താവളത്തിലെത്തിയിരുന്നു. 2012-ല്‍ രാധെമാ ഇടപെട്ട് വിവാഹം നടത്തിയ യുവതിയുടെ പരാതിയിലാണ് പോലീസ് നടപടി. സ്ത്രീധനം കുറഞ്ഞതിന്റെപേരില്‍ ഭര്‍തൃവീട്ടുകാര്‍ പീഡിപ്പിച്ചുവെന്നും ശിക്ഷാനടപടിയെന്ന നിലയില്‍ ബോറിവ്‌ലിയിലെ രാധെമായുടെ ആശ്രമത്തില്‍ സേവനം ചെയ്യാനെന്നുപറഞ്ഞ് അയച്ചുവെന്നും പരാതിയില്‍പറയുന്നു. ആശ്രമത്തില്‍ പലപണികള്‍ക്കും നിയോഗിച്ചു. എതിര്‍ത്തപ്പോള്‍ മര്‍ദിക്കുകയും ചെയ്തു. കാന്തിവ്‌ലി പോലീസ് രജിസ്റ്റര്‍ ചെയ്ത എഫ്.ഐ.ആറില്‍ രാധെമായുടെ പേരുണ്ട്.

പഞ്ചാബ് ഹോഷിയാര്‍പുര്‍കാരിയായ സുഖ്വിന്ദര്‍ കൗര്‍ ആണ് രാധെമാ ആയിമാറിയത്. ദുര്‍ഗാദേവിയുടെ അവതാരമാണെന്ന് അവര്‍ അവകാശപ്പെടുന്നു. അല്പവസ്ത്രധാരിയായി അനുയായികളോടൊപ്പം നൃത്തം ചെയ്തുവെന്ന വിവാദവും ഉയര്‍ന്നിട്ടുണ്ട്. ഭര്‍ത്താവ് ജോലിതേടി ഗള്‍ഫില്‍പോയപ്പോള്‍ തനിച്ചായ അവര്‍ നാട്ടില്‍ രാംദീന്‍ ദാസിന്‍ എന്ന ആളോടൊപ്പം വിവിധകേന്ദ്രങ്ങളില്‍ സത്സംഗത്തില്‍ പങ്കെടുക്കുകയും പിന്നീട് സ്വന്തമായി സത്സംഗങ്ങള്‍ക്ക് നേതൃത്വം കൊടുത്തുവരികയുമായിരുന്നു. ദുര്‍ഗാ മാതായുടെ അവതാരമാണെന്നുള്ള അവകാശവാദത്തിനെതിരെ ഹിന്ദുസംഘടനയായ പഗ്വാര രംഗത്തുവന്നതിനെത്തുടര്‍ന്നാണ് അവര്‍ മുംബൈയിലേക്ക് പ്രവര്‍ത്തനകേന്ദ്രം മാറ്റിയത്.
 http://www.mathrubhumi.com/online/malayalam/news/story/3755565/2015-08-10/india